【喺呢個非常時候，冇嘢可以分開我同你】
/圖片來源：路透社/
「喂...你唔會放開我㗎可？」子悠隔住勞工手套捉緊我隻手。
我即刻反過嚟捉實子悠隻手，強撐住笑容同佢講：「嗯！梗係唔會啦傻妹！我哋唔會放開你，就算...係被...」
我預咗12月同子悠求婚，本來呢個諾言佢唔講，我都會主動講出口，應該要用好堅定嘅語氣，穩定子悠不安嘅情緒，但...我竟然猶豫。
連日嚟嘅遊行、集會話俾我聽，有人根本唔容許我哋和平。回想起幾個月以嚟嘅新聞，和平呢兩個字變得可笑，好可笑，望住喺盾牌後面...一道道好似想將我哋撕開兩個嘅目光，腦海中頓時閃過我被捉住，子悠唔肯放手，連累到佢嘅畫面。我承認我呢刻有啲自私，因為我最接受唔到佢喺我身邊離開。寧願有咩事我放手，佢走先，我留低。
好想盡我一切力量保護佢。
我一路諗，一路本能咁捉住子悠推去我背脊後面。
「嘭！嘭！嘭！」
喺我哋拖住手離開嗰陣，背後突然有幾吓槍聲傳出。倉惶、驚恐已經不足以形容呢刻心情，聽到後面猶如野獸般嘅咆哮，感覺到愈來愈迫近嘅壓力，下意識就想停低，用自己嘅身體阻止佢哋前進，好讓子悠多啲時間逃跑。
就喺我想打賭雞蛋能否可以對抗高牆一瞬間，子悠竟然死捉住我隻手向前衝。
同子悠一齊嘅日子裡面，我好清楚佢係好細膽、冇安全感，易喊嘅小綿羊，好多時我要將佢小心翼翼捧喺掌心，生怕跌爛。惟如今嘅佢，正喺度帶領住我不停跑，不停跑，充滿力量同勇氣。
有人話，當人遇到生死之間，就會爆發全身潛藏嘅力量，我諗子悠就係咁。
好彩我哋終於成功離開危機，去到一間快餐店裡面。原本想檢查子悠身體有冇不適，一抬頭就見到佢雙眼通紅，撕心裂肺咁講：「應承我，任何時候都唔好放手，我哋要一齊迎接真正自由嘅一日，到時我哋直接簽紙結婚，開開心心咁活到白頭，好冇？」
我呆一呆，再俾佢一個溫暖又可依賴嘅笑容道：「好，老婆，冇嘢可以分開我同你。」
Search